Imtixaanka shahaadiga ah ee sannad waxbarasheedka 2023

Imtixaanka shahaadiga ah ee sannad waxbarasheedka 2024, warbixin dhammaystiran.

Waxbarashadu waa furaha guusha iyo horumarka aadanaha, waa misbaaxa maanka, baanta nafta, istareexa araga, sooryada maqalka, iyo dhaxalka faca koraya iyo kuwa xiga.

Ummaduhu waxay horomarka ugu kala dheereeyaan sida ay ugu kala horreeyaan geeddiga tacliinta, Soomaalida inkasta oo jug wayni ka soo gaartay burburkii dawladeed, haddana waa ummad shacabkeedu ka tayo badanyahay dawladihii kala danbeeya ee ay heleen.

Waxbarasho ehli ah oo ku tiirsan aqoonyahanka waddaniga ah iyo waalidka oo noqday maalgeliyaha koowaad ee tacliinta dalka ayaa u suurta gelisay da’yarteenna in ay helaan tacliin leh tayo wanaagsan marka loo eego duruufta lagu aasaasay ee ay ilaa hadda ku shaqayso.

sanad dugsiyeedka 2023-2024 ayaa soo gaba gaboobay waxaana loo fariistay imtixaannadii fasallada caadiga ah (Naqliga) iyo fasallada shahaadiga ah, intii u dhaxaysay dabayaaqada bisha 5aad iyo horaanta bisha 6aad.

Shabakadda Som-Exams oo kaydisa imtixaannada dalka Warbixintaan waxay diiradda ku saari doontaa imtixaannadii shahaadiga ahaa ee dalka laga qabtay sannad waxbarasheedka 2023/2024.

Halkan waxaan idiin ku soo gudbin doonnaa imtixaannadii laga qaaday ardayda todoba maamul goboleed iyo Caasimadda [banaadir] tirada u fariisatay imtixaannada iyo xogo kale oo muhim ah, kuwaas oo aan ka soo xigannay warbixinaha ay baahiyeen wasaaradaha waxbarashada iyo komishinada imtixaanka ee ka jira dalka.

Banaadir

Tirada ardayda u fariisatay imtixaanka fasalka 4aad ee Dugsiga ayaa gaaraysa 22,193 arday, halka ardayda fsalka 8aad ee dugsiga dhexe ay gaarayso 35,307 arday. [1]

Tirada guud ee ardayda u fariisatay imtixaanka shahaadiga ah ee Gobolka Banaadir (8-aad iyo 12-aad) waa 54,252 arday.

Puntland

Wasiirka wasaaradda waxbarashada iyo tacliinta sare ee Puntland Fuad Abshir Ahmed ayaa sheegay in ay imtixaanka fasalka 8aad ay u fariisteen ardey gaareysa 14,239 ardey, iyo fasalka 4aad ee dugsiga sare oo gaaraya 7,562 ardey oo isugu jira wiilal iyo gabdho,

Tirada guud ee ardayda u fariisatay imtixaanka shahaadiga ah ee dawlad goboleedka Puntland (8-aad iyo 12-aad) waa 21,801 arday. [2]

Somaliland

Somaliland Sannad dugsiyeedka 2023/2024 imtixaanada shahaadiga ah ee fasalka 8aad dugsiga dhexe, iyo fasalka 4aad ee dugsiga sare waxa u fadhiistay arday dhan 38,489 oo arday, sida uu sheegay guddoomiyaha kommishanka imtixaanaadka.

15,542 waxay ka aflaxayaan waxbarashada dugsiga sare, halka 22,947 ay ka qalin beddelanayaan dugsiga dhexe, ardaydani waxa ay ka koobantahay waxbarashada tooska ah, waxbarashada farsamada gacanta, iyo waxbarashada dadka baahiyaha gaarka ah qaba.[3]

Galmudug

Imtixaanka shaadiga ah ee sannad dugsiyeedka 2022/2023 fasalka 8aad oo ay qaadday wasaaradda waxbarashadadawlad goboleedka galmudug waxa u fariistay 6,715 arday.[4]

Imtixaannada fasalka 4aad ee dugsiga sare waxa u fariistay 2,533 oo arday, imtixaanka waxa lagu qaaday 13 xarumood oo ku kala yaal 8 degmo oo ka tirsan maamul goboleedka Galmudug. [5]

Tirada guud ee ardayda u fariisatay imtixaanka fasalka 8aad ee dugsiga dhexe iyo fasalka 4aad ee dugsiga sare waa 7,375 arday.

Jubbaland

Imtixaanka dugsiga saree e maamul goboleedka Jubbaland waxa u fariistay 2,500 arday oo isugu jira gabdho iyo wiilal. [6]

Imtixaanka dugsiga dhexe waxaa ka qayb galay arday tiradoodu gaarayso 4,357 oo arday, sida lagu sheegay qoraal lagu faafiyay bogga Wasaaradda Waxbarashada, Hiddaha & Tacliinta Sare ee Jubbaland. [7]

Tirada guud ee ardayda u fariisatay labada ee heer ee imtixaanka waa 6,857 arday maamul goboleedka Jubbaland.

Hirshabeelle:

Sanad dugsiyeedka 2023/2024 maamul goboleedka hirshabeelle imtixaanka shahaadiga ah ee fasalka 12aad waxa u fariistay 2,781 oo arday. [8]

Halka imtixaannada fasalka 8aad ay u fariisteen arday gaaraysa 5,228 arday, waa sannadkii 5aad oo xariir ah oo wasaaradda waxbarashada ee Hirshabeelle ay qaadayso imtixaanka shahaadiga ah ee dugsiga dhexe. [9]

Wadarta guud ee ardayda u fariistay imtixaannada fasalka 8aad ee dugsiga dhexe iyo fasalka 4aad ee dugsiga sare waa 8,009 arday.

Koonfur galbeed

Dawlad goboleedka koonfur galbeed Imtixaanka shahaadiga ah ee dugsiga sare sannad dugsiyeedka 2023/2024 waxa u fariistay arday dhan 5,158 oo arday, [10] halka imtixaanka dugsiga dhexe ay u fariisteen 11,784 arday. [11]

Imtixaanka Tirada guud ee ardayda u fariistay imtixaannada shahaadiga ah waa 16,942 arday, imtixaanka waxa lagu qaaday 22 xarumood oo ka tirsan maamul goboleedka koonfur galbeed.

SSC khaatumo

Wasiirka wasaaradda waxbarashada iyo tacliinta sare ee SSC Khaatumo C/xakiin Jaamac Dalmar ayaa sheegay in imtixaanka fasalka 4aad ee dugsiga sare ay u fariisteen arday dhan 1,254, halka imtixaanka fasalka 8aad ay u fariisan doonaan 2,404 ardey oo isugu jira wiilal iyo gabdho [13]

Tirada guud ee ardayda u fariisatay imtixaanka shahaadiga ah ee dawlad goboleedka SSC Khaatumo (8-aad iyo 12-aad) waa 3,658 arday.

Gaboabo:

Tirada guud ee ardayda u fariistay imtixaannada fasalka 8aad ee dugsiga dhexe guud ahaan soomaaliya waa 94,502 arday, halka tirada guud ee ardayda u fariistay imtixaannada fasalka 4aad ee dugsiga sare ay gaarayaan 58,115 arday.

Wadarta ardayda u fariistay labada heer ee imtixaannada shahaadiga ah ayaa isku noqonaysa 152,617. Maamulka Kayd xogeedka imtixaanka ee Som-Exams wuxuu u rajaynayaa dhammaan ardayda soomaaliyeed mustqabal ifaya, wuxuuna ugu ducaynayaa in ay noqdaan kuwo dalkooda anfaca, sidoo kale waxaan rajaynaynaa in sannadka danbe tirada ardayda soomaaliyeed ee u fariisan doona imtixaannada shahaadiga ah ay gaari doonaan 200,000 oo arday.

Tixraac

1- Agaasinka Waxbarashada Gobolka Banaadir

2- Bogga wasaaradda Waxbarashada Iyo Tacliinta sare ee Puntland

3- Somaliland Ministry of Education and Science 

4- Bogga Wasaaradda Waxbarashada Galmudug

5- Bogga Wasaaradda Waxbarashada Galmudug

6- Jubbaland TV

7- Horn Cable TV

8- Bogga wasaaradda waxbarashada Hirshabeelle

9- Bogga wasaaradda waxbarashada Hirshabeelle

10- Bogga wasaaradda waxbarashada Koonfur Galbeed

11- Bogga wasaaradda waxbarashada Koonfur Galbeed

12-

13- Wasaaradda Waxbarashada, Hiddaha iyo Tacliinta Sare SSC-Khaatumo

Leave a Reply

error: Lama ogola !!